На 28. седница на генералната конференција за тегови и мерки, одржана од 13 до 15 октомври во Версај, во близина на Париз, беа усвоени одлуки од историско значење за иднината на мерењето на времето, вклучувајќи промени во примената на престапната секунда и подготовки за нова дефиниција на секундата – соопшти денеска Дирекцијата за мерки и скапоцени метали.
На седницата усвоени се седум резолуции, меѓу кои и одлуките за иднината на координираното универзално време (УТЦ), подготовките за редефинирање на секундата и развој на меѓународна временска референција за Месечината.
Една од најважните одлуки се однесува на иднината на таканаречената престапна секунда, која периодично се додава од 1972 година со цел да се хармонизира времето мерено со исклучително прецизни атомски часовници со времето базирано на ротацијата на Земјата, се наведува во соопштението на Дирекцијата за мерки и скапоцени метали.
Новите меѓународни решенија, чија имплементација почнува на 20 мај 2027 година, создаваат услови за континуирано функционирање на светското време, без потреба од сегашните периодични корекции.
Оваа промена е од исклучителна важност за современиот свет бидејќи сателитската навигација, телекомуникациите, интернетот, банкарскиот и финансискиот систем, како и многубројни други технологии што граѓаните ги користат секојдневно, зависат од прецизно и континуирано мерење на времето, исканаа од Дирекцијата.