Гркинка сред шестото десетлетие од својот живот роди бебе од ембрион што бил замрзнат 22 години, откако го загубила својот 21-годишен син, кој бил зачнат преку истата постапка за вонтелесно оплодување (ИВФ), соопшти нејзиниот лекар во средата.
– За Кристина Рапти-Целепи, ова раѓање има особено длабоко емотивно значење“, објави на Фејсбук гинекологот Константинос Пантос од приватната клиника „Генезис“ во Атина. – Во 2004 година, по преносот на ембрионот, таа роди потполно здраво машко дете уште при првиот обид. Сепак, нејзиниот син загинал во сообраќајна несреќа во октомври 2025 година, на 21 година, додаде тој.
Во средата, таа роди девојче откако лани во декември ѝ бил пренесен ембрион од истата серија што била користена и за зачнувањето на нејзиниот син.
Кристина Рапти-Целепи има 54 години, што е максималната возраст дозволена во Грција за спроведување на постапката за вонтелесно оплодување. Нејзиниот сопруг објасни дека семејството водело „вистинска трка со времето“ за да ја износи бременоста до крај. Тој повика и на укинување на старосната граница за ИВФ во Грција.
– Постарите жени поседуваат непроценлив капацитет да понудат зрела, свесна и безусловна љубов, како и стабилност што ниту една статистика не би можела целосно да ја измери, изјави тој.