Јапонската полиција уапси 32-годишна жена под сомнение дека го попречувала работењето на издавачката куќа „Shueisha Inc.“ со тоа што нарачувала производи повеќе од 2.000 пати, а потоа ги откажувала.
Мају Јошида ги прифатила обвиненијата изјавувајќи дека тоа го сторила поради стрес. Според полицијата, таа од јули 2024 до мај 2025 година, нарачувала големи количини фигурини и други производи поврзани со популарната манга серија „One Piece“ преку онлајн продавницата „Jump Characters“ на издавачката куќа „Shueisha“, а потоа ги откажувала нарачките, пред да ги плати.
За таа цел жената користела повеќе од 200 различни кориснички сметки за пазарење. Нарачките биле автоматски откажувани бидејќи таа не го извршувала плаќањето во предвидениот рок или одбивала да ги прими доставените пакети кои требало да ги плати по прием.
Компанијата го пријавила случајот во јуни минатата година.