Еден работник од регионот преку социјалните мрежи сподели непријатно искуство од работа во околината на Штутгарт, тврдејќи дека наместо ветени добри услови и стабилна заработка, бил соочен со лошо сместување, доцнење на плата и спорни одбитоци.
Како што наведува, пред шест месеци заминал во Германија поради ветување за плата од 15 евра бруто на час и обезбедено сместување. Работата ја нашол преку посредник од Балканот, но реалноста, според него, била сосема поинаква.
„Кога стигнав, нѐ смести четворица во една соба. Имаше влага насекаде, а бањата ја делевме со уште осум луѓе“, напишал работникот во својата објава.
Тој тврди дека проблемите започнале уште со првата плата.
„Првата плата ми доцнеше речиси три недели, а кога конечно стигна, голем дел беше одбиен за сместување и некакви измислени трошоци за документи. Ми останаа едвај доволно пари за храна“, наведува тој.
Според неговото сведоштво, кога побарал објаснување од работодавачот за намалената исплата, добил груб одговор.
„Ако не ти се допаѓа, пакувај ги куферите. На граница има стотици што чекаат на твоето место“, наводно му рекол шефот.
Неговата приказна предизвика лавина реакции на социјалните мрежи, каде многумина му советувале случајот да го пријави во германската инспекција за труд и во царинската служба Zoll.
„Пријави го. Zoll едвај чека вакви случаи“, гласи еден од коментарите.
Дел од корисниците споделиле сопствени негативни искуства со работодавачи од Балканот во Германија, со коментари како „Бегајте од нашите“ и „Нашите се најлоши“.
Сепак, имало и такви кои ги бранеле балканските компании, тврдејќи дека постојат и чесни работодавачи.
„Работев три години кај Балканец и немаше поисправен човек“, напишал еден корисник.
Други, пак, посочиле дека работниците треба внимателно да ги читаат договорите пред потпишување и да не се потпираат само на усни ветувања.