Ајкула, забележана на 18 септември во тесен канал во крајбрежен парк во Бусан, Јужна Кореја, одбива да си замине веќе речиси три недели, и покрај обидите на надлежните власти да ја спасат. Според градските власти, ајкулата којашто жителите ја нарекоа „Буканг-и“ – според Северното пристаниште, привлече повеќе од 1,02 милиони посетители во паркот, објавија тамошните медиуми.
Поморската полиција и властите првично се обидоа да ја избркаат ајкулата од каналот, но подоцна започнаа операција за спасување, стравувајќи дека долготрајниот престој во ограничениот простор може да ја загрози нејзината издржливост. За време на првиот обид на 29 септември, пет пловни објекти користеа водени млазови за да ја насочат ајкулата кон отвореното море. Сепак, ајкулата ги избегна млазовите, а операцијата беше прекината по околу пет часа работа и обиди.
Во вториот обид во петокот, спасувачкиот тим постави мрежа долга 50 метри и висока 6,8 метри. Сепак, мрежата се закачи за дното на каналот, а ајкулата не направи обид да излезе. Спасувачите на крајот ја отстранија мрежата за да ѝ овозможат на ајкулата сама да излезе, но без успех.
Националниот институт за наука за рибарство соопшти дека секојдневно ја следи здравствената состојба на ајкулата и дека досега не се откриени сериозни проблеми.