Денес започнува новата учебна година. Ниту на еден основец, па ни средношколец не му е лесно да се навикне на училишните обврски по распустот, а особено е тешко за најмалите, за првачињата.
Експертите велат дека родителите тука треба да имаат клучна улога, без разлика колку и самите се возбудени, пишува „Јумама“. Психолозите и педагозите советуваат дека на почетокот не треба да ги оптоварувате најмалите и дури е добро да ги оставите првите денови да си го направат своето.
Не претерувајте со прашања
Првите училишни денови треба да бидат светли и опуштени за децата. Дозволете им да јадат за појадок што сакаат, да изберат што да облечат… На крајот на денот, не претерувајте со прашања! Оставете го детето да ги изрази своите впечатоци и дочекајте го со омиленото јадење и десерт, за на овој начин да му дадете важност на овој настан и да му направите убав спомен.
Што треба да знае првачето
Пред да тргне на училиште, детето не мора да ги знае сите букви и математички операции, доволно е да има развиени графомоторни вештини (основа за успешно совладување на техниката на пишување), концепт на вредност на броеви, развиен говор и вокабулар, а сè друго се надградува и учи на училиште.
– Независноста на детето е поважна од сето ова. Треба само да знае да оди во тоалет, да јаде, да пие, да врзува врвки од чевли, да ги складира своите работи. Се друго останува да се научи – велат експертите.
Охрабрете ги децата
Советувајте ги децата внимателно да го слушаат наставникот на час и објаснете им дека така ќе им биде полесно и побрзо да ја научат лекцијата дома, па ќе имаат повеќе време за игра. Препорачете му да се договори со другарите да се дружи после училиште или за време на викендот, а на паузите меѓу часовите да разговара со другите и пред се‘ да ги слуша.