Маслинките не се само вкусен додаток во салатите и медитеранската кујна – тие се вистинска ризница на хранливи материи и важен дел од здравата исхрана. Иако многумина ги сметаат за зеленчук, маслинките всушност се овошје и нудат бројни придобивки за организмот.
Една од нивните најголеми предности е позитивното влијание врз здравјето на срцето. Благодарение на здравите незаситени масти и антиоксидансите, маслинките помагаат во одржување на нормално ниво на холестерол и го намалуваат ризикот од кардиоваскуларни заболувања.
Освен тоа, маслинките можат да бидат сојузник и во контролата на телесната тежина. Истражувањата покажуваат дека луѓето кои редовно ги консумираат имаат поголемо чувство на ситост, внесуваат помалку калории во текот на денот и поретко се прејадуваат. Се смета дека придонесуваат и за повисоко ниво на серотонин – хормонот кој е поврзан со доброто расположение и чувството на задоволство.
Црните маслинки се особено богати со масни киселини и антиоксиданси кои ја хранат, хидрираат и штитат кожата од предвремено стареење. Редовната консумација може да придонесе и за поздрава, посилна и посјајна коса.
Дополнително, маслинките се добар природен извор на железо, особено црните сорти. Железото е неопходно за транспорт на кислородот во организмот, а неговиот недостаток може да предизвика замор, слабост и чувство на студ.
Иако се многу здрави, маслинките треба да се консумираат умерено бидејќи најчесто содржат поголеми количини сол. Неколку маслинки дневно се доволни за да ги искористите нивните здравствени придобивки како дел од балансирана исхрана.