SPF 30 или SPF 50 – која заштита од сонце да ја изберете?
Со високите летни температури и силното сонце, кремата со заштитен фактор станува важен дел од секојдневната заштита на кожата. Но, често се поставува прашањето – дали SPF 30 е доволен или сепак треба да се избере SPF 50?
SPF е кратенка од „Sun Protection Factor“, односно фактор за заштита од сонце. Бројката покажува колкава заштита обезбедува производот од UVB зраците кога е правилно и доволно нанесен.
SPF 30 пропушта приближно 1/30 од UVB зрачењето, односно филтрира околу 96,7 проценти, додека SPF 50 пропушта околу 1/50, односно обезбедува заштита од приближно 98 проценти од UVB зраците.
Иако разликата во проценти изгледа мала, SPF 50 пропушта помалку UVB зрачење од SPF 30. Но, ниту еден крем за сончање не обезбедува стопроцентна заштита.
Клучно е производот да се нанесува во доволна количина и повторно да се нанесува, особено по пливање, обилно потење или бришење со пешкир. Во спротивно, реалната заштита може да биде значително пониска од онаа наведена на пакувањето.
Кремата, сепак, не треба да биде единствената линија на одбрана. Заштитата од сонце треба да вклучува престој во сенка, соодветна облека, шешир и очила за сонце, особено кога УВ-зрачењето е силно.
Не е важна топлината, туку УВ-зрачењето
Една од честите заблуди е дека крема со SPF е потребна само кога надвор е многу топло и сончево. Температурата, сепак, не го одредува нивото на УВ-зрачење.
Ултравиолетовите зраци можат да бидат присутни и во облачни или посвежи денови. Долготрајната изложеност без соодветна заштита придонесува за изгореници, предвремено стареење на кожата, оштетувања на очите и зголемен ризик од рак на кожата.
Затоа, при изборот на крема важно е да се обрне внимание не само на SPF, туку и производот да обезбедува широкоспектарна заштита од UVA и UVB зраци.