Првиот турски астронаут и уште тројца членови на екипажот лансирани кон Меѓународната вселенска станица

Првиот турски астронаут и уште тројца членови на екипажот од Европа беа лансирани вчера од Флорида на патување до Меѓународната вселенска станица во комерцијална мисија на приватната компанија „Аксиом Спејс“ од Тексас.

Капсулата „Кру Драгон“ на Спејс Икс, со четворица астронаути, се подигна со ракета Фалкон 9 околу еден час пред зајдисонце од вселенскиот центар Кенеди на НАСА во Кејп Канаверал, започнувајќи го планираниот 36-часовен лет до орбиталната лабораторија. Лансирањето беше прикажано во живо преку веб-пренос.

Автономно пилотираниот „Кру Драгон“ се очекува да пристигне до Меѓународната вселенска станица рано наутро во сабота и да се приклучи на станицата, која орбитира околу 400 километри над Земјата и во моментов е дом на седум постојани членови на екипажот.

Одговарајќи на честитките на Контролата на мисијата, командантот на летот Мајкл Лопез-Алегрија преку радио од „Кру Драгон“ рече: „Како што реков, тоа е тимски спорт. Ви благодарам момци“.

Неколку минути претходно, долниот дел за повеќекратна употреба на ракетата се одвои од остатокот од вселенското летало и полета назад кон Земјата и безбедно слета во зоната за слетување во близина на местото на лансирање.

Оваа мисија беше трет таков лет на „Аксиом Спејс“ со седиште во Хјустон во изминатите две години, додека компанијата ја продолжува својата работа на испраќање астронаути спонзорирани од странски влади и приватни компании во орбитата на Земјата.

Компанијата на своите клиенти им наплатува најмалку 55 милиони долари за секое астронаутско место.