Мараја Кери возврати на тужбата за клевета што ја поднесе нејзиниот брат, и тврди дека е во јавен интерес таа да зборува за него во своите мемоари.
Постариот брат на Мараја, Морган Кери, започна правна постапка против поп ѕвездата на почетокот на оваа година, во која тврди дека таа изнела „злонамерни лаги“ за него во нејзината книга The Meaning of Mariah Carey објавена минатата година.
Морган ја обвини Мараја за клевета и намерно нанесување душевна болка по објавувањето на книгата мемоари во која таа раскажува за деструктивна борба помеѓу Морган и нивниот татко и открива дека нејзиниот брат бил институционализиран кога бил помлад.
Мараја во својата книга исто така пишува дека „никогаш не се чувствувала безбедна во присуство на својот проблематичен брат поради неговиот непредвидлив бес“.
Но, сега, како што пренесува „Пејџ сикс“, 51-годишната поп ѕвезда поднесе документи до Врховниот суд во Менхетен во кои наведува дека нејзините тврдења не се клевета, бидејќи пораката на книгата за нејзиниот личен триумф над неволјите е прашање од јавен интерес.
Таа наведува дека нејзината приказна е од јавен интерес поради нејзината слава и затоа што сакала да ги охрабри младите луѓе кои исто така се соочуваат со тешки проблеми во текот на растењето.